پاکستان کا ڈیجیٹل اثاثوں اور بلاک چین جدت میں عالمی قیادت کا ہدف

اسلام آباد: پاکستان خود کو عالمی سطح پر ڈیجیٹل اثاثوں اور بلاک چین ٹیکنالوجی کے شعبے میں مستقبل کے رہنما کے طور پر پیش کر رہا ہے۔ اس سلسلے میں پاکستان کے وزیر مملکت برائے کرپٹو اور بلاک چین، بلال بن صقیب نے اس ہفتے واشنگٹن ڈی سی میں اعلیٰ امریکی حکام سے ملاقاتیں کیں تاکہ مالیاتی ٹیکنالوجی اور کرپٹو ضوابط پر تعاون کو فروغ دیا جا سکے۔

اپنے دورۂ امریکہ کے دوران وزیر مملکت نے امریکی سینیٹروں سے ملاقات کی جن میں کرپٹو قانون سازی کی مؤثر حمایتی سینیٹر سنتھیا لومِس، سینیٹر بل ہیگرٹی، رِک اسکاٹ، ٹِم شیہی، اور جم جسٹس شامل ہیں۔ اس کے علاوہ ہاؤس فنانشل سروسز کمیٹی کے ارکان اور وائٹ ہاؤس کے مشیران سے بھی بات چیت ہوئی۔

بلال بن صقیب نے کہا:
"پاکستان پیچھے رہنے کے لیے نہیں آیا، ہم قیادت کے لیے یہاں موجود ہیں۔ میں نے پاکستان کا ایک نیا چہرہ پیش کیا — نوجوانوں، جدت، اور عالمی شراکت داریوں سے مزین۔”

پاکستان کا ڈیجیٹل فنانس روڈ میپ

بات چیت میں پاکستان کے تازہ اقدامات پر روشنی ڈالی گئی، جن میں شامل ہیں:

• اسٹریٹیجک بٹ کوائن ریزرو قائم کرنا

• ورچوئل اثاثہ جات کے لیے ریگولیٹری فریم ورک تیار کرنا

• رقوم کی منتقلی کو آسان بنانے کے لیے اسٹیبل کوائنز کو فروغ دینا

پاکستان سالانہ 36 ارب ڈالر کی ترسیلات زر اور ایک متحرک فری لانسنگ شعبے کے ساتھ خطے میں ایک ذمہ دار ڈیجیٹل مالیاتی مرکز بننے کا ہدف رکھتا ہے۔

بلال بن صقیب نے کہا:
"ہمارا مقصد دنیا بھر کے بہترین آئیڈیاز کو اپنا کر پاکستان کی مخصوص ضروریات پوری کرنا ہے۔”

پاک-امریکا بلاک چین تعاون کو مضبوط بنانا

اس دورے میں امریکی کونسل آف ایڈوائزرز آن ڈیجیٹل ایسٹس کے ایگزیکٹو ڈائریکٹر رابرٹ بو ہائنز سے وائٹ ہاؤس میں ایک اعلیٰ سطحی ملاقات بھی شامل تھی۔ اس ملاقات میں جن نکات پر بات چیت ہوئی، وہ درج ذیل ہیں:

• بٹ کوائن کے انضمام کے لیے اسٹریٹجک تعاون

• غیر مرکزی (decentralized) انفرااسٹرکچر کی تعمیر

• ڈیجیٹل اثاثہ جات کی مؤثر قانون سازی

• نوجوانوں کو بلاک چین کے ذریعے مالیاتی شمولیت دینا

دونوں ممالک نے اس بات پر زور دیا کہ وہ ایسے انوویشن ایکو سسٹمز کو فروغ دینا چاہتے ہیں جو معیشتی شمولیت کو تیز کریں اور ابھرتی ہوئی مالیاتی ٹیکنالوجیز کی مکمل صلاحیت سے فائدہ اٹھائیں۔

پاکستان میں کرپٹو کا بڑھتا رجحان

2021 کے بعد پاکستان میں کرپٹو کرنسی اور بلاک چین ٹیکنالوجی میں دلچسپی میں نمایاں اضافہ ہوا ہے، جب ملک میں ڈیجیٹل اثاثوں میں سرمایہ کاری میں تیزی سے اضافہ دیکھا گیا۔ پاکستان کی نوجوان آبادی، ڈیجیٹل مہارت، اور عالمی ترسیلات زر کے ذریعے حاصل ہونے والے مالی وسائل، ملک کو جنوبی ایشیا میں بلاک چین قیادت کی دوڑ میں آگے لا سکتے ہیں۔

وزیر مملکت کا امریکہ کا یہ دورہ اس بات کی علامت ہے کہ پاکستان ایک فعال اور جامع ڈیجیٹل معیشت کی تشکیل کے لیے عالمی قیادت کے ساتھ مل کر ڈیجیٹل فنانس کے مستقبل کو خود ڈیزائن کرنے کی کوشش کر رہا ہے۔